|
الحريف
|
عادات اجتماعيه قاريه
أسعد الله أوقاتكم
اليوم عنا موضوع مابيكمل الا بمشاركاتكم الرائعه
كل قصة الموضوع بتقول
أنه لما يدخل العضو ليشارك معنا هون
لازم يكتب عادة من عاداتنا القاريه
وهيك الجيل الطالع بيتعرف على عادات أجداده
فكل واحد فيكن بيعرف معلومة
لايبخل علينا فيها
بس المهم يكون متأكد منها
واذا العادة اللي ذكرها العضو مو قاريه
رح تنحذف مشاركته من الموضوع
وياريت كل واحد بدو يشارك معنا
يكتب عنوان مناسب لنوع العادة اللي رح يشارك فيها
وحبذا لو كل مشاركة تحوي عادة واحدة
واللي حابب يكتب عادة تانية يحطها بمشاركة تانية
يلا بدنا نتذكر كل عاداتنا
عصرولي مخكن مليح
وشرفونا ونورونا بما عندكم
دمتم بألف خير قاريه
----------------------------------
الحيـاة كالبحر إذا أردت العيش فيها خذ معك سفينة الصبـر
تم تعديل هذه المشاركة بتاريخ 26-1-2011 الساعة 15:49 من قبل: الحريف
|
|
26-1-2011
15:48
|
|
|
الحريف
|
سوف ابدأ بأول مشاركه
شطاح العنب
عادات بلدتنا عادات جميلة وحلوة كتير
بتذكر لما كنا نقطف العنب وناخده عالشطاح
كنا نلم العيلة والجيران كلهن ونروح كلنا على شطاح العنب
ونعمل غدا البرغل دفين وننبسط كتير تلاقي الكل عم يشتغل
حامل الافه في ايده ومعبيها عنب ورايح على المسكبه الفاضي
عند الي مهتمين بنقع العنب واشطاحه ليصير زبيب
ذكرتينا بهالايام الحلوة كنا مترابطين كتير ومجتمعين دوم
في كل شي وان شاء الله بنضل متل ما كنا ايام زمان
الكل معزوم عالشطاح اذا صار عنا العنب هالسنة
جهزولي الافف تبعكم كلكم هههههههه
انا لح جهز البرغلات واللحماة للغدا
----------------------------------
الحيـاة كالبحر إذا أردت العيش فيها خذ معك سفينة الصبـر
|
|
26-1-2011
15:52
|
|
|
الحريف
|
عجينة العروس..
من العادات القاريه القديمة والدائمة لحد الآن عجينة العروس
يتم تحضير العجينة من قبل اهل العريس
قديماً ماكانت تتزين(سادة يعني) بعدين صاروا يزينوها بالورد وعلى شكل أشكال متل طاقية أو قلب وغيرو...
وعند قدوم العروس إلى بيت العريس وقبل دخولها إلى البيت تعطى العروس العجينة وتلصق على جدار البيت..
وبيصيروا يقولوا اويييييي إيدك..
وبيصير كل مين بدو يفوت عالبيت يخبط خبطة..
وبيقولوا إزا لزقت العجينة يعني العروس ثابتة إن شاء الله إما إزا زحطتت شوي يعني ما ثابتة..
وكلوا بيضل حكي والله أعلم..
تحياتي...
----------------------------------
الحيـاة كالبحر إذا أردت العيش فيها خذ معك سفينة الصبـر
|
|
26-1-2011
19:01
|
|
|
الحريف
|
الكبة أيام زمان
أول شيء بحب أن أذكركم أنه لم يكن مكائن لفرم اللحم متل زماننا
العدة (جرن الكبة و المدقة) طبعا كانت العروس تفتخر أنها جابت جرن كبة في جهازها شي عظيم وكبير أنها مدللة عند عريسها وبيت حماها
بعد شراء الهبرة من اللحام تتم عزيمة الأهل والجيران لدق الكبة وتبدأ تنعيم اللحمة بالنحيح كل ضربة في الجرن ومعها( أح أح أح أح )
حتى تصبح اللحمة متل المرهم ويبدأ إضافة البرغل ودقه مع البرغل في الجرن وبعض الصبايا تجهز الكشك لسلق الكبة وتفوح الرائحة حتى أبعد الجيران تعرف أن بيت فلان عم يدقو كبة والأولاد حول الجرن ينتظرون عطف اللواتي عم يكبكبو وبشقفة كبة نية ويتلمض فيها أكثر من يأكلها وبعد هذا العناء في عمل الكبة وفي المساء تجتمع العائلة مع الأهل وبعض الجيران الذين شاركو بمساعدة ست البيت ويتباهو بمن كبتها أحلى وخاصة اذا كان صبايا تكون فرصة لوالدة الشباب لمعرفة من العروس التي تناسب ابنهم لأن العروس ليست للعريس فقط وانما كنة العائلة والعمل والحصيدة وكل الأعمال المنزلية والكروم فهي محل اهتمام الحماية قبل العريس
للعلم دق الكبة أصعب من الأعمال الشاقة مجهود كبير جدا
أرجو أن أكون قد وفقت بالشرح عن هذه العادة
تحياتي للجميع
----------------------------------
الحيـاة كالبحر إذا أردت العيش فيها خذ معك سفينة الصبـر
|
|
26-1-2011
19:13
|
|
|
الحريف
|
عاد ة من عادات الضيعة التي انقرضت إلا ما ندر وهي
الشـــــــــراااق
طبعا كانت بيوت الضيعه من اللبن والطين وكانت الضيعة كلها تطلي بيوتها بمادة كلسية موجودة في قارة فقط
وصاحب المنجم عندو حمار ويتجول في شوارع الضيعة وينادي
شراااااق شرااااق يا الله عالشراق
وهي عبارة عن أأحجار كلسية تنقع من أسبوع وما فوق حتى تذوب وتصبح قابلة للطلي
وعدة الطلي
(فروة) عبارة عن قطعة من جلد الغنم مع صوف طويل
وتستعد ست البيت لهذا اليوم كل سنة مرة واحدة بعد الانتهاء من موسم الحصاد و البيدر
وللمعلومة بعد طلاء البيت تفوح رائحة الشراق لمدة شهر ومن أحلى الروائح لها رونق خاص
ويرجع البيت جديد بثوب أبيض ناصع
انشاء الله أكون قد وفقت بهذه العادة والشرح عنها
تحياتي للجميع
----------------------------------
الحيـاة كالبحر إذا أردت العيش فيها خذ معك سفينة الصبـر
|
|
26-1-2011
19:18
|
|
|
الحريف
|
الجعيلة
يلي زارع قمح بعد ما بكمل حصاده
بينصب هالجعيلة على باب بيته من على بكرة الصبح
وبكون عازم قريبينه وجيرانه على الشغل والمساعدة
وبيسلقوا القمح وبينشروه على السطح
وكنا نحنا الصغار يعطونا صحون القمح المسلوق حتى نوديها للجيران والأقارب
وكن نتقاتل مين يلي بدو يوصل الصحن طبعا منشان الحلوان
إيه إصالله
كانوا بيت جدي كل سنة ينصبوا الجعيلة
الحلو في الجعيلة هي روح التعاون مع الضحك طبعا والمرح
وحسب موسم القمح مرات كانوا يضلوا لليل وهني عم يسلقوا القمح
وعلى شرب مته وشغل وفطور وغدا وناس ترتاح وناس تشتغل وناس عم تفرد القمح على السطح وناس بتحرك القمح وناس بتحط حطب وووووو
بتمنى أكون وفيت الجعيلة حقهاههههههههه
----------------------------------
الحيـاة كالبحر إذا أردت العيش فيها خذ معك سفينة الصبـر
|
|
27-1-2011
10:12
|
|
حسن البريدي
مشرف
|
تحياتي ..
شكراً لتواصلك وموضوعك المفيد أخي - الحريــف .
ولا بأس بالتذكير بهذه العادات أو بهذا الموروث الشعبي بشكلٍ عام، رغم ورود المعلومات أكثر من مرة في المنتدى .
وأعتقد بأن النصوص لو كانت باللغة العربية الفصيحة لكان وقعها في نفس القارىء أقوى، لطالما كانت تدور في فلك هذه الشبكة العنكبوتية التي يتصفحها القاصي والداني .. القريب والغريب .. العربي والغربــي .. وفي أي وقت ، ولطالما كانت عبارة عن معلومات تراثية وشعبية وتمثل رمز للأصالة عبر ماضي الأجداد .
مرحباً .
----------------------------------
- كن كالغيث.. أينما هلَّ ؛ نفع ..
|
|
27-1-2011
12:14
|
|
|
الحريف
|
السلام عليكم ورحة الله وبركاته
شكرا لك اخي حسن على هذه اللفته الكريمه انا الحمدلله خريج جامعه وكان بامكاني ان اكتب باللغه العربيه الفصحى كما تحب ولكني عندما كنت أتصل بالناس الكبار لكي اتعرف على هذه المورثات الجميله حبيت انو اكتبها متل ما تلقيتها بلهجتهم الجميله البسيطه من شان تكون اقرب للناس وشكرا
----------------------------------
الحيـاة كالبحر إذا أردت العيش فيها خذ معك سفينة الصبـر
تم تعديل هذه المشاركة بتاريخ 27-1-2011 الساعة 16:05 من قبل: الحريف
|
|
27-1-2011
15:41
|
|
|
الحريف
|
((( عادات منسية )))
كان قديما أمام كل بيت في قاره قطعة من الحجر يقال لها مسطبة
و هي مكعبة الشكل و مختلفة بالأطوال من بيت لبيت
كان الناس يجلسون عليها صباحا أو مساء و ذلك لعدد من الأسباب
بعضهم كان يجلس على تلك المسطبة لتبادل الأحاديث و كان الأغلب من النساء
و بعضهم الآخر ليشربون المتة أو الشاي
و البعض تجده جالسا لوحده فقط ليشاهد الناس المارّين من الطريق و يتبادل معهم السلامات
و المنظر الرائع أيضا جنب تلك المسطبة هو إما عامود الكهرباء الخشبي الذي يكون مائلا نوعا ما
أو مزراب للماء ( أنبوب لتفريغ المياه من سطح المنزل إلى الشارع ) الذي عادة ما يكون بجانب المسطبة
و جرن الكبة المصنوع من الحجر و يكون في الجهة المقابلة للمسطبة
يعني لو كانت المسطبة على يسار باب البيت يكون جرن الكبة على الجهة اليمينية و العكس صحيح
تلك المناظر التي لم نعد نرى منها إلا ما هو نادر جدا في أيامنا هذه
فكل شيء تغير
تحياتي
----------------------------------
الحيـاة كالبحر إذا أردت العيش فيها خذ معك سفينة الصبـر
تم تعديل هذه المشاركة بتاريخ 27-1-2011 الساعة 17:23 من قبل: الحريف
|
|
27-1-2011
15:43
|
|
|
سوسو الشام
|
ايه نيالكم على هالعادات انا ماشفت منها شي غير السليقة وحضرتها مرة وحدة
ماقلتلكم غريبة عن بلدي
----------------------------------
غريبة عن بلدي
|
|
27-1-2011
17:11
|
|
سنجق عرض
عضو مميز
|
شكرا إلك حريف
وبما أنو عم تسأل ناس كبار بالعمر بتمنى تستفسرلنا عن عمر المتة في ضيعتنا بأي سنة عرفناها وايمتى صارت مشروب رسمي عند الرجال والنساء لأني بتذكر من شي 40 سنة كان يقال المتة للنسوان وكان إكرام الضيف عندما يكون رجل يكون بتقديم الشاي وليس المتة
يا ريت تفيدنا عن هالموضوع ومرسي لجهودك
|
|
27-1-2011
17:32
|
|
|
الحريف
|
المته
شكرا لك اخي سنجق عرض
طبعا انا سئلت اكثر من ختيار في الضيعه وكلهم اجمعو على قصة واحده وهي كالأتي
دخلت المته الى سوريا منذ زمن بعيد قبل اكثر من 100 سنه عن طريق المهاجرين السوريون في اميريكا الجنوبيه وعلى ذمة الرواه انه كان تحويل او ارسال العمله ممنوع وكانوا يهربونها في علب المته في البدايه كانوا يأخذون النقود ويرمون المته وبعد فتره اصبحوا من اكثر البلدان ترويجا لهذه الماده (المته)
----------------------------------
الحيـاة كالبحر إذا أردت العيش فيها خذ معك سفينة الصبـر
تم تعديل هذه المشاركة بتاريخ 27-1-2011 الساعة 20:18 من قبل: الحريف
|
|
27-1-2011
18:15
|
|
سنجق عرض
عضو مميز
|
بقي الشق الثاني من السؤال بلا إجابه 
|
|
27-1-2011
18:25
|
|
|
الحريف
|
الدبس
السلام عليكم
الكثير من جيل هالايام يأكل الدبس ولكن لا يعرف كيف يصنع الدبس
ولا يعرف ان في الضيعة معصرة دبس اثرية
طبعا انا حكيت اول شي عن الشطاح
وهو تغميس العنب في القلو - شنان محروق مع زيت-
وبعد ينشر في الشمس لحتى يصير زبيب
وطبعا يو م الشطاح من اجمل ايام العمل الجماعي المساعدة بين العائلة والجيران والاقارب
وبعدها يجمع العنب ع المعصرة يا الربع
وبعدها يغرم في ماكينة ويوضع معه شوية تبن
ويوضع في قسم مخصص في المعصرة على شكل كومة واحدة
ويترك حتى ينشف ويقسو
طبعا بيصير متل الحجر
وطبعا في المعصرة تشاهد اجمل مشاهد التعاون بين اهل الضيعة
وبعدها تأتي مرحلة الفت
كل واحد معه قدوم وقاعد يضريب في هالحجر - الزبيب المدروس-
وطبعا الفت لازم يكون قطع صغيرة مشان المرحلة القادمة
وفي هالمرحلة بتشوف العالم اللي بتخلص شغلها بتساعد غيرها
وخصوصا الختايرة - لان اكتر الموجودين من كبار السن- الله يخيلنا اياهم بركة لهالضيعة
وانا كنت اروح دايما مع جدي الله يطولنا عمره
وبعدها بياخدوا الفت ع التواغير وهي دوائر هرمية باتجاه الاسفل يوضع فيها الفت ويضاف عليه الماء
ويترك فترة حتى يسحب الحلا الموجود في الزبيب
والتواغير الها فتحة من الاسفل لتغريغ الجلاب - الماء المضاف الذي تحلا من الزبيب-
وبعدها تأتي مرحلة التدبيس
يوضع الجلاب في حلة كبيرة وتشعل النار تحتها
وبتضل تغلي لحتى تشد
وينقل الى البيت ويوضع معه شوية دبس قديم يسموه اجدادنا خميرة
وبتبلش مرحلة الضرب
يضرب الدبس في المضرب - عصاة خشب مخصصة لهالشي
ثم يوضع في سطول او علب
وفي البيوت القديمة يوضع في خابة كبيرة - فخار- موجودة في بيت المونة - الخزانة- وطبعا البيوت القديمة من اللبن وبتكون باردة في الصيف وهيك بيضل الدبس شدود حتى في الصيف
وفيه ناس بتخلي في الحلة اللي بينعمل فيها الدبس شوية جلاب وبتغليهم اكتر من الدبس شوي
وبتحطهم في علب صغيرة وبتحط ع الوجه فستق وجوز ولوز واسم هالاكلة شغليل وبيوزعوها ع القرايب والجيران
وفيه اكلة تانية اسمها شبربئة
وهي آخر ما يضل في اسفل الحلة من الجلاب المغلي لدرجة الحرق
ويصب فورا في جلاب بارد تحت التواغير فيتجمد مباشرة ويأكل منه اغلب الموجودين في المعصرة ويوزع ع الجيران ووووووووووووو
وتوتي توتي خلصت الحتوتة
واجمل شي في هالشي الروح الجماعية والتعاون والالفة في كل مراحل التدبيس
بتحس الكل عايلة واحدة
الله يديم المحبة بين اهل الضيعة مهما تغيرت وتقدمت ضيعتا الحلوة
تحياتي
----------------------------------
الحيـاة كالبحر إذا أردت العيش فيها خذ معك سفينة الصبـر
|
|
27-1-2011
20:25
|
|
|
الحريف
|
الكحيله
وهلئ عادة قديمة حتى يمكن منسية الكحيلة
وهي بعد ليلةالدخلة بليلة بيتجمعو شباب العريس عند العرسان ومابحلو الا لما تجيبلهم ام العروس زبيب وجوز وحلويات وبغنولها للحماي ما بنروح الليلة حتى ناكل كحيلة واذا بدكن ترضونا زبيب وجوز طعمونا وسلامتكن
----------------------------------
الحيـاة كالبحر إذا أردت العيش فيها خذ معك سفينة الصبـر
|
|
28-1-2011
16:33
|
|
|
الحريف
|
بنا كمان مشاركة الاعضاء ولو كل واحد بعاده واحده على الاقل من شان الجيل الجديد يعرف عدادنا وشكرا
----------------------------------
الحيـاة كالبحر إذا أردت العيش فيها خذ معك سفينة الصبـر
|
|
28-1-2011
16:38
|
|
|
الحريف
|
الخلبوص
يا سيدي أنا رح أحكيلكون عن عادة كانت تصير في الأعراس بتحدى تكون خطرت على بال حدا فيكون وهيي عادة (الخلبوص ).
والخلبوص شخص كان يتنكر بشكل مضحك وكوميدي يعني مثلا كان يلبس جلاجيب (أقمشة وملابس بالية ) ويعلق على صدرو أشياء تدعو للضحك متل الكفكير مثلا أو مقشة وكان أجيانا يحط في راسو طاسة سمنة فارغة ويفوت عالحوقة في العرس ويرقص مع الراقصين .
واعتقد إنو هادي العادة الطريفة والجميلة على الأغلب انقرضت بشكل كامل
----------------------------------
الحيـاة كالبحر إذا أردت العيش فيها خذ معك سفينة الصبـر
|
|
29-1-2011
19:13
|
|
|
الحريف
|
في كمان عادة سلق القمح للولد أو البنت لما بيطلعو سنانهن، هي كمان من عادات أهل الضيعة وبيصبو القمح المسلوق بصحون وبيزينوه بالمكسرات وجوز الهند والقباقيب (نوع من حلوى الأطفال) وبيوزعو عالعيلة والمعارف والجيران مشان يعرفو انو طلعو سنان الولد، الحمد لله
----------------------------------
الحيـاة كالبحر إذا أردت العيش فيها خذ معك سفينة الصبـر
|
|
29-1-2011
19:23
|
|
زهرة جبلية
عضو مميز
|
الخبز على التنور
من العادات القديمة الأساسيه اليومية التي كانت تقوم بها النساء في قارة لتأمين القوت
حيث كان النسوة تعجن العجين المكون من طحين القمح أو الدرة أو الشعير أحيانا مع الماء وقليل من الملح وقطعة صغيرة من عجينة اليوم الفائت(خميرة) من الليل ومع بزوغ الفجر يشعلن التنور باستخدام الحطب والشيح الذي جمع خصيصا لهذه العملية ..
وبعد أن يحمى التنور ويتحول الحطب الى جمر
تقوم النسوة بتقريص العجين المختمر ورقه على الأيدي ثم وضعه على (الكارة) لتلصقه على جوانب التنور وماهي إلا ثواني حتى يكون الخبز قد نضج ..
(إيه سقاالله وقت كانت أمي تخبزلنا وخاصة عند كل عيد وتساويلنا الطلامي بزعتر والمجمرة ...)
----------------------------------
إذا استطعنا أن نرى المعجزة في زهرة بوضوح............لتغيرت حياتنا
|
|
30-1-2011
09:55
|
|
|
الحريف
|
الدومري
الدومري هو متعهد إضاءة الشوارع والأزقة قديما
بعد صلاة المغرب مباشرة يجمع كل الفوانيس والكازات
ويوزعها بعد تعبئتها بزيت الكاز
ويضع في الشوارع الرئيسة فوانيس
وفي الأزقة والحارات فوانيس لتضيء البلدة ليلا
طبعا أنا من اللذين لم يعاصرو هذه العادة بطفولتي
وكان في الضيعة متعهدين لها قبل توصيل الكهرباء في قاره
ومنها أتى التعجب في الحديث بين شخصين
( والله ما في الدومري في الشارع)
تحياتي للجميع
----------------------------------
الحيـاة كالبحر إذا أردت العيش فيها خذ معك سفينة الصبـر
|
|
30-1-2011
15:53
|
|
|
زياد زوادة
|
لبنية الدرة
كان في السابق في كل حارة من الحارات القديمة حجر بازلت كبير
بشكل جرن وله أيضا مدقة حجر كان يوجد في حارة باب الجامع
وحارة اللأميم وحارة بيت وردة وأماكن متعددة كانت تجتمع نساء الحارة
لكي يدقو الذرة الصفراء بعد تجفيفها لفترات طويلة وبعد ذلك ليطبخوها
مع اللبن الماعز الحامض واللحم والعظم وليست كالبنية الذرة الآن (بالذرة المجروشة)
وتحياتي للجميع
|
|
30-1-2011
17:01
|
|
ابو شريف
عضو مميز
|
السلا عليكم مع صحن لبنيه درهههههههههههههههههههههه
----- يا سيدنا هاللبنيه شو طيبه----------------------------------
|
|
31-1-2011
17:38
|
|
|
الحريف
|
الحصاد
قديما كان اجدادنا يزرعون الجبل كله شعير
وطبعا والمزارع قمح لانه بدها مي
ونحنا ما لحقنا ع ايام الحصاد الكبيرة
بس جدي الله يعطيه القوة وطولة العمر ما زال يزرع الى الان
وكنا نروح كل العيلة كبار وصغار
ناخد فطور وعدة الطبخ طبعا برغل دفين
ونروح نحصدوالاولاد تلعب وتفرح وتنطوط ع الزرع
وجدي يعيط ويسب ابوهم وجدهم
ولما بيخلص الحصاد
بيجيب الدراسة وبيحطوا الحصاد فيها
بيطلع الشعير لحاله والتبن لحاله
طبعا ايام الحصاد ايام شاقة
بس بيحكولنا الكبار انها كانت من اجمل الايام قديما
وكانوا اغلب اهل الضيعة يطلعوا ع الحصاد
ويحتفلوا ويغنوا ويدبكوا وكانت ايام ملتقى الشباب والصبايا والعشاق والمخطوبين
يمكن ما عطيت هالمناسبة حقها لانها كانت اهم مواسم قاره
بس هادي معلوماتي لاني كنت صغير
وهالحكي سمعته من الكبار
وكانوا يسموها ايام الحصاد
----------------------------------
الحيـاة كالبحر إذا أردت العيش فيها خذ معك سفينة الصبـر
تم تعديل هذه المشاركة بتاريخ 31-1-2011 الساعة 20:17 من قبل: الحريف
|
|
31-1-2011
20:17
|
|
|
أديب
|
الحصاد - قصدك ( الحصيدة )
|
|
1-2-2011
12:38
|
|
|
الحريف
|
المباركات بالمناسبات
يمكن يكون هالموضوع موجود مو بس بقاره بس بتصور بقاره موجودة بشكل أكبر وأوسع من حيث نوع المناسبات يلي بباركوا فيها ، يعني دائما بتشوف النسوان رايحين يباركوا ، فلانة ولدت وفلان ابنه نجح وفلانة بنتها نجحت وفلان اتخرج وفلان فك من الجيش وإذا فلان ززززززززززززز برحوا بباركوله ههههههههه
----------------------------------
الحيـاة كالبحر إذا أردت العيش فيها خذ معك سفينة الصبـر
|
|
1-2-2011
20:08
|
|
|
الحريف
|
السلام عليكم يا بني ضيعتي الكرام
حبيت أشارك بالعادات الحلوة اللي كانت موجودة عنا بس ما بعرف أنو إذا لساها موجودة ولا لأ...
هي شغلة خميس العرايس اللي كانت فيها أم العروس بتحضر كل شي بهالبقجة وبهاد اليوم بتروح لعند بيت العريس وما بتكون مخلي حدا من العيلة إلا ومتذكرتو بشغلة حتى لو جوز جرابات من أصغر واحد بالعيلة حتى أكبر واحد ...
طبعاً بتكون حصة العريس أكتر شي
شو حلوة عادات ضيعتنا بس إنشالله ما تنقرض مع مرور الزمن
أتمنى تعجبكم مشاركتي
----------------------------------
الحيـاة كالبحر إذا أردت العيش فيها خذ معك سفينة الصبـر
|
|
4-2-2011
18:09
|
|
