حمود
عضو مميز
|
(-.¸¸.•´¯`•.¸¸.•´¯ ســــــتي -.¸¸.•´¯`•.¸¸.•´¯)
سلامٌ عليكم
أطرح لكم هذا الموضوع لأرجع بكم إلى أيام نحبها جميعاً
أيام الطفولة
أيام كنا نجلس صغاراً وكباراً في مكان دافئ – حرارةً وحناناً – يلفنا جميعا حنان شخص واحد، حنان الجدة – تلك الانسانة التي كانت تؤنس جلساتنا بحديثها الرائع وقصصها المؤنسة.
خطر لي أن أخصص هذه الزاوية لنتذكر فيها تلك القصص الجميلة والتي ترتبط في أذهاننا جميعاً بزمان البراءة والسعادة الصافية.
نروي في هذه الزاوية هذه القصص الجميلة بكل ما تحمل من خفة دم وتشويق وأخطاء الخ.
ولنبدأ:
تم تعديل هذه المشاركة بتاريخ 4-3-2004 الساعة 14:48 من قبل: حمود
|
|
4-3-2004
14:37
|
|
حمود
عضو مميز
|
_¸,o©°¯ ¯°©o,¸ خيارة بنت بستان _¸,o©°¯ ¯°©o,¸_
كان ياما كان كان بسالف العصر والأوان لحتى كان.
كان في ملك و عنده صبي اسمو علاي الدين (علاء الدين بالعامي) وبيوم من ذات الإيام مرض هالصبي قام الملك ندر إذا صح الصبي انو يمشي له ساقية سمن وساقية عسل
والحمد لله صح الصبي قام والله هالملك مشّى ساقيتين ساقية سمن وساقية عسل.
وصارت هالناس تملّي من الساقيتين. هيد جاب جرة واللخري جاب جرتين. وكان للملك جارة عجوز ما بتطلع من بيتها قامت اجت لعندها جارتها وسألتها ليش ما عم تعبي متلنا بكرة إذا دري الملك والملكة بدهن يزعلو منك.
قامت والله هالختيارة راحت وأخدت معها قنينتين صغار وقطنة وصارت تغط هالقطنة بهالساقية وتعصرها بالقنينة لحتى عبتهن. قام شيفها مين ؟ علاي الدين وكين معو مطاطة (نقيفة) قام انقهر منها عمنها عم تعمل هيك وحط هيك وكسرلها القناني بالمطاطة. قامت الختيارة انقهرت وبدها تدعي علي دعوة خفيفة قامت قالتلو: روح الله يرميك بهوى خيارة بنت بستان.
قام الصبي استغرب. وقال خيارة بنت بستان؟ مين هيه هالخيارة؟ ووين عايشة ومدري شو .....
قام راح لأمو وقللها: يا أمي قيمي فراش الهنا وحطي فراش العنكبوت، ابنك علاي الدين بدو يموت.
قالتلو أمو: يا ابني يا حبيبي لسا ما صحّيت شو بدك تروح ولوين ؟؟
قام الصبي قاللها بدي روح جيب خيارة بنت بستان. جهزولي الفرس.
قامو والله ما لقو حل إلا انو يعملو متل ما بدو، وجهزولو فرس عليها خفيف الوزن غالي التمن.
مسك هالأمير درب طريقو ومشي.
قام وصل ع مطرح لقى فيه غولة شعرها طويل ومنكوش، وعيونها مبرزقة ومنظرها بيخوّف. قام والله هالأمير اجا وطلع المشط اللي معو ومشطها وقصلها اضفيرها وعطرها وظبط امورها. قامت قالتلو:خــــي !!! الله يمشطك يا علاي الدين متل ما مشطتني.
قالتلو وين رايح يا عيني؟ قللها: رايح جيب خيارة بنت بستان. بتعرفي من وين؟ قالتلو: لا والله يا عمري بس في أختي أكبر مني بيوم وأعرف مني بسنة روح من هون واسألها.
والله رد علاي الدين مسك درب طريقو ومشي متل ما قالتلو هالغولة قام لقى اختها على نفس الحال قام عمل معها نفس الشي. قامت بعتتو لأختهون الكبيرة وطبعا عمل نفس الشي معها قامت عطتو كركر خيطان وقالتلو هالكركر بضل بكر لحتى توصل عالبستان.
مشي علاي الدين وهالكركر يكر لحتى وصل ع باب البستان .
يتبع
تم تعديل هذه المشاركة بتاريخ 4-3-2004 الساعة 14:46 من قبل: حمود
|
|
4-3-2004
14:45
|
|
نور
عضو مميز
|
والله يا حمود فكرة حلوة لأنو فعلا الجمعة عند بيت الجد وبالذات حوالي الست
كتير حلوة والله يخليلنا ياها يارب
بس ممكن طلب صغير 
كملنا القصة
سلامي
تم تعديل هذه المشاركة بتاريخ 4-3-2004 الساعة 17:38 من قبل: نور
|
|
4-3-2004
17:37
|
|
مجيد
عضو مميز
|
شكراً لك يا صديقي العزيز حمود
لطالما أحببت أن تشارك بهذا الموضوع الذي يحرك مشاعرنا شوقاً إلى
أيام الطفولة والبراءة والنقاء ، تلك الأيام التي كنا تلتف فيها حول الصوبيا
على ضوء اللوكس لتروي لنا الجدة حكايا الغولة والقرعة وأبو علي
و ........ إي سقألله
أشكرك على الفكرة ..........
|
|
4-3-2004
22:05
|
|
حمود
عضو مميز
|
الجزء الثاني من
_¸,o©°¯ ¯°©o,¸ خيارة بنت بستان _¸,o©°¯ ¯°©o,¸_
دخل علاي الدين على هالبستان وهو عم يتذكر نصيحة الغولة الكبيرة:
"إذا فتت ولقيت الغيلان مغمضين عيونهن بيكونو فايقين يا مشحّر فلا تفوت وإذا لقيتهم مفنجرين عيونهن بيكونو نايمين بتفوت لجوا وبتمشي وبتسمع الشجر عم يقللك يا علاي الدين تعال كول مني بس أوعك تاكل ولا كمان بيفيقوا الغوال. بتوصل للأخير بتلاقي خيار بتعبي خرجك من الخيار وبتروح. بس أوعك تاكل من الخيار لحتى توصل ع بركة أو عين مي.
والله هالـ علاي الدين نفذ الوصية بحذافيرها وعبى خرجو وطلع.
بس صار يسأل حالو: طيب ليه ما بدي آكل منهن؟؟ وشو هوه هالخيار؟ ومدري شو!!!
قام ما استنى وطلع أول خيارة وفقشها. قامت طلعتلو منها بنت بتاخد العقل بتقللو للقمر غيب لأقعد مطرحك مفتي وقاضي ونقيب. وقالت له: عطشانة اسقيني!! قام قللها والله ما معي مي يا عيني قامت ماتت.
وضل هالأمير يعمل هيك حتى فضّى الخرج.
قام وصل فجأة ع بركة مي وقال يا رب لاقي شي بعكورة صغيرة وصار يبحبش قام لقى بعكورة صغيرة قام كسرها وغطسها بالمي دغري قامت شربت وعاشت. قام هادا انسطل بهالشوفة – بنت بتمزع العقل!!!
مين انتي؟
أنا خيارة بنت بستان !!
هالأمير شلح عبايتو ولبسها للخيارة بنت البستان. وحطها ع شجرة عالية لبين ما يروح يجيب أهلو والحاشية تبعو ليزفوها الزفة بتلبقلها.
حد هالشجرة كان في بيت واحد بيقولولو الحمصاني وعندو عبدة سودا خدامة عندهن.
راحت هالعبدة لتملي مي من هالبركة قامت شافت صورة البنت الحلوة بالمي وفكرتها صورتها. قامت قالت: "أهذا حسني وجمالي وانا جارية الحمصاني؟؟؟؟ انكسري يا هق انبعجي يا هق" (الهؤ أو الحؤ شغلة متل الجرة)
رجعت هالعبدة عالبيت وقالت لستها: انكسر الهق قامت قالتلها: يقرف عمرك يللا خدي غيرو.
رجعت العبدة وعملت نفس الشي مرتين تلاتة. بعدين اشتلقت واطّلّع لفوق وشافت الخيارة. وصارت تقول لحالها هيدي انتي وأنا مفكرة أنو أنا؟؟ م م م م م !!!
دخيلك يا ستي طالعيني لعندك؟ الله يخليكي. قامت الخيارة دندلت شعرها الطويل واتعربشت عليه العبدة وطلعت لعندها. وصارو يسولفو وحكت الخيارة قصة الأمير وشلون بدو يرجع لحتى يتزوجو.
قامت الغيرة زادت بقلب العبدة السودة وقالت لحالها والله ماني مخليتها تروح وبدي روح بدالها.
وطلعت من عبها كمشة دبابيس مسحورة وصارت تملحسلها ع شعرها وتقلها شو هالشعر الحلو يا روحي ويا عيني وكل شوية تغز دبوس بشعر البنت.
هيك لحتى خلصو الدبابيس . ووقت اللي شكت آخر دبوس صارت البنت حمامة. قامت العبدة كشتها وقعدت مطرحها.
يتبع
|
|
6-3-2004
01:05
|
|
أحدهم
عضو مميز
|
شكرا يا حمود على هالقصة الحلوة وعم ننتظر الجزء الثالث
|
|
6-3-2004
09:37
|
|
محمد ربيع الشيخ
مشرف
|
شكراً
شكراً لك (( حمود )) على هذا الأسلوب الرائع والشائق
فكرتك جداً موفقة
|
|
6-3-2004
09:57
|
|
حمود
عضو مميز
|
الجزء الثالث من
_¸,o©°¯ ¯°©o,¸ خيارة بنت بستان _¸,o©°¯ ¯°©o,¸_
برجعة مين ؟؟؟
الأمير. جاية وجايب أبو وأمو الملك والملكة والخدم والحشم ومدري شو. وقت اللي وصل اتطلع هيك قام انسطل وقت اللي شاف العبدة البشعة سألها لك شو صرلك يا مشحرة؟؟؟
- ولك ليش اسوديتي؟؟
- من السمس (الشمس)!
- ولك ليش شفاتيرك كبار؟
- من كتر ما بزقت عليكي!
- وليش خشمك كبير؟
- من كتر ما مخطت عليكي!
قام هالأمير نزلها وقال الله يعطينا الصبر.
أخد الأمير عروستو عالقصر وكان العرس مجهز والناس محضرة حالها لأنو ** سبع تيام ماحدا بيطبخ ولاحدا بينفخ إلا ببيت السلطان **
والله اتزوج الأمير هالعبدة السودة واشتغل العرس والناس كلها تجي تاكل ببيت السلطان. وكان في بالقصر عشّي (يعني طباخ) وبيوم من إيام العرس اجت الحمامة اللي كانت خيارة بنت بستان ووقفت على شباك المطبخ وقالت:
- ياعمي العشي
- يا عيون عمك العشي
- نام السلطان؟
- نام السلطان.
- عانق السودان؟
- عانق السودان.
- هرّي يا دموعي لولو ومرجان ع خيارة بنت بستان.
وصارت تبكي وينزل بدل الدموع لولو ومرجان. قام هالعشي صار يلملم لولو ومرجان وانشغل عن الطبخ قام احترق الرز.
تاني يوم رجعت الحمامة وعملت نفس الشي:
- ياعمي العشي
- يا عيون عمك العشي
- نام السلطان؟
- نام السلطان.
- عانق السودان؟
- عانق السودان.
- هرّي يا دموعي لولو ومرجان ع خيارة بنت بستان.
ورجع العشّي حرق الرز.
هيك شي تلت اربع مرات حتى العالم تضايقت وإجى الأمير لعند العشي وقللو: ولك بدي قص راسك ليه عم تحرق الرز؟؟ قللو العشي: دخيلك يا سيدي القصة هيك هيك هيك.
قام الأمير سألو: وأيا ساعة بتجي؟ قللو وقت اللي بتكون نايم يعني العصرية.
راح الأمير وإجا تاني يوم وتخبا عند شباك المطبخ بنفس الوقت واستنا الحمامة لتجي.
اجت هالحمامة وبلشت:
- نام السلطان؟
- نام السلطان.
نط هالأمير وكمش الحمامة وقالها تعاي لهون كمشتيك.
أخدها وراح قعد حد بركة لقصر وصار يلحمسلها وكل شوي يغز ايدو دبوس يقوم يقيمو هيك لحتى قامهون كلهون قامت فزت قدامو البنت الحلوة اليي شافها أول مرة قام قللها: ولك انتي وين كنتي وليش رحتي وكذا ... قامت حكتلو القصة من طقطق للسلام عليكن.
قام والله هالأمير لبسها أحسن لبس وأخدها عالقصر معو وخبر أهلو القصة. وسألها للخيارة شو بدك سوي فيها لهالعبدة فقالتلو:
عطّش الخيل سبع تيام وجوّع الكلاب سبع تيام وعلقها بدناب الخيل وردهن على المي وفلّت الكلاب وراهن خلي الخيل تشحطها والكلاب تنتفها.
العبدة السودة يا حرام ماتت موتة الكلاب.
بيرجع مرجوعنا لابن الملك سوا هالعرس من أول وجديد لا حدا بيطبخ ولا حدا بينفخ إلا ببيت السلطان
وتوتة توتة
خلصت الحتوتة
وبعبكن مفلوتة
ونبقى
بانتظار القصة الجديدة
وهي بعنوان
ميش ميش
تم تعديل هذه المشاركة بتاريخ 9-3-2004 الساعة 01:45 من قبل: حمود
|
|
9-3-2004
01:44
|
|
PIN CODE
عضو مميز
|
فعلا قصة حلوة بيكيفو عليها الولاد ههههه
|
|
9-3-2004
16:55
|
|
حمود
عضو مميز
|
كان يا ما كان بقديم الزمان وسالف العصر والأوان لحتى كان،
ما منحكي لتصلو على النبي العدنان - صلى الله عليه وسلّم.
كين في تاجر عندو أجير وهالأجير عالبركة شوي وبينسى كتير.
وبوم من ذات الإيام قللو هالتاجر للإجير: روح واشتريلي بفرنكين ميش.
راح هالإجير ونّو رجع بعد شوي، قللو معلمي نسيت شو بدي جيب!!
قللو التاجر: بفرنكين ميش !!! لا تنسى ! ضل قول ميش ميش طول الطريق حتى ما تنسى! فهمت؟
والله مسك هالإجير درب طريقو ومشي وهو عم يقول:
ميش ميش – ميش ميش
بـمرقة تلات زلم رايحين عالصيد – وقف الإجير قدامهن وصار يقول:
ميش ميش – ميش ميش
قامو انقهرو منو وضربو سبع تمن كفوف.
- أي أي دخيلكون – ليش هيك؟
قالولو: شايفنا رايحين عالصيد وقاعد تقول ميش ميش؟
- دخيلكون، شو بدي قول لكين؟
قول يللا سبعة تمانة من هالكبار!
والله هالإجير المعتر مشي وهو عم يقول يللا سبعة تمانة من هالكبار – يللا سبعة تمانة من هالصغار!
قامت مرقت من قدامو جنازة واحد شب، ويا حرام أهلو زعلانين عليه وعم يبكو وينوحو،
وقف قدامهن هالإجير وصار يقول: يللا سبعة تمانة من هالكبار – يللا سبعة تمانة من هالصغار!
قام اجى واحد من أهل الميت وسفقوا سبع تمن كفوف.
- أي أي دخيلك – ليش هيك؟
قاللو: يا ابن الكلب ماو عيجبك ميت واحد بدك سبعة تمانة؟؟؟
- دخيلك، شو بدي قول لكين؟
- قول الله يرحمو الله يرحم اخواننا المسلمين !!
مشي هالإجير وهو عم يقول الله يرحمو الله يرحم اخواننا المسلمين.
قام شاف ع طرف الطريق كلب فاطس – قام وقف جنبو وصار يقول الله يرحمو الله يرحم اخواننا المسلمين- الله يرحمو الله يرحم اخواننا المسلمين.
مرق زلمه من جنبو وشافو قام اجى وسفقو سبع تمن كفوف.
- أي أي دخيلك – ليش هيك؟
قاللو: يا ابن الكلب – هيدى أخوك المسلم؟؟؟
- دخيلك، شو بدي قول لكين؟
- قول تفه ما أوخمو - تفه ما أموشمو
مشي هالإجير وهو عم يقول: تفه ما أوخمو - تفه ما أموشمو - تفه موخمو - تفه موشمو.
قامت مرقت بطريقو عرباية لبنت السلطان – معطرة ومزوقة وعليها هالورد والروايح عم تفوح منها وشي بشهي.
وقف هالإجير قدام العرباية وصار يقول: تفه موخمو - تفه موشمو، تفه موخمو - تفه موشمو،
قام اجى الحارس تبع الأميرة وسفقو سبع تمن كفوف.
- أي أي دخيلك – ليش هيك؟
قاللو: شو ماي عيجبتك كل هالروايح الحلوة حتى عم تبزق وتقول تفه موخمو؟؟؟
- دخيلك، شو بدي قول لكين؟
- قول خي ما أطيبو – خي ما أحلاه
مشي الإجير وهو عم يقول خي ما أطيبو – خي ما أحلاه ،، خي ما أطيبو – خي ما أحلاه
قام شاف بطريقو اتنين عم يتخانقوا ، قام وقف وصار يتفرج عليهم
يخبط الأولاني كف للتاني، يقول الإجير: خي ما أطيبو
يخبط التاني كف للأولاني، يقول الإجير: خي ما أحلاه
كف – خي ما أطيبو
كف – خي ما أحلاه.
قامو تركو بعضهن ودارو عليه، وسفقو سبع تمن كفوف.
- أي أي دخيلكون – ليش هيك؟
قالولو: شايفنا رح ندبح بعضنا، وواقف تقول هيك؟
- دخيلكون، شو بدي قول لكين؟
قول الله يصلحهون الله يصلح إخواننا المسلمين!
مشي الإجير وهو عم يقول: الله يصلحهون الله يصلح إخواننا المسلمين! الله يصلحهون الله يصلح إخواننا المسلمين!
قام لقى بطريقو كلبين عم يتهاوشو، قام وقف قدامهن وصار يقول: الله يصلحهون الله يصلح إخواننا المسلمين! الله يصلحهون الله يصلح إخواننا المسلمين!
قام شافو واحد مارق قام اجى سفقو سبع تمن كفوف.
- أي أي دخيلك – ليش هيك؟
قاللو: هدول اخوانك المسلمين يا هايشة؟؟؟
- دخيلك، شو بدي قول لكين؟
- قول طلع وشت – طلع وشت
مشي هالإجير مرة لخرى وصار يقول، طلع وشت – طلع وشت ،،، طلع وشت – طلع وشت ،،،، طلع وشت – طلع وشت
طلع وشت – طلع وشت
طلع وشت – طلع وشت
قام اجى لقدام محل اسكافي، وهالسكافي جوى معجوق بالشغل ماسك هالبصطار بايدو وما عم يعرف يصلحو، يشدو من هون يفلت من هون، وأخلاقو طالعه ومعصب كتير، وقف الإجير قدامو وصار يقول:
طلع وشت – طلع وشت
طلع وشت – طلع وشت
هادا السكافي سمعو عم يقول هيك، قام حمل البصطار وسفقو فيه ع راسو
- أي أي دخيلك – ليش هيك؟
قاللو: شو شايفني كلب قدامك عم تقللي طلع وشت؟؟؟
- دخيلك، شو بدي قول لكين؟
- قول شطها مطها بتطلع مديس !! (مديس = مداس = حذاء)
مشي هالإجير وصار يقول: شطها مطها بتطلع مديس !! شطها مطها بتطلع مديس !!
قام مرق من قدام الحلاق وكان القاضي طالع من عند الحلاق ومزبط دقنو ومحنجرها وعم يملحس عليها ومبسوط فيها كتير. صار الإجير يطلع في ويقول:
شطها مطها بتطلع مديس !!
شطها مطها بتطلع مديس !!
قام اجى القاضي وسفقوا سبع تمن كفوف.
أي أي دخيلك – ليش هيك؟
قاللو: شو شايف دقني صرماية عم تقللي شطها مطها بتطلع مديس؟؟؟
- دخيلك، شو بدي قول لكين؟
- قول ميش ميش !!
قام الإجير ضرب ع راسو واتذكر شو قللو معلمو وركض عالسوق وهوه عم يقول:
ميش ميش
واشترى اللي قللو عليه معلمو.
وتوتة توتة بعبكون مفلوتة
قوموا ناموا.
|
|
15-3-2004
00:36
|
|
مسعود حمود
عضو مميز
|
:)
حمود .. ، دخيلك لا توقف ، عم نستنا القصة الجاية ...
شكراً حبيبي من القلب ..
------------------------------------------------------------------------
مسعود حمود
masoud_hamoud@hotmail.com
----------------------------------
مدونتي
|
|
20-3-2004
01:07
|
|
حمود
عضو مميز
|
عودٌ على بدء.
أرجو من أطفال الموقع المعذرة على الانقطاع، لكن الظروف قاهرة كما تعلمون (خصوصاً وقد أصبحت في عداد الخاطبين).
المهم بلا طول سيرة
صلو عالنبي واسمعوا هالحكاية
******** حكاية الولد الهايشة ********
كان يا ما كان بسالف العصر و الأوان لحتى كان في صبي و أمه وعندهم عجل كل يوم
هالولد بيأخذ العجل وبيروح كل يوم يسرح فيه.
ومرة من ذات المرات شاف بطريقه بومة قاعدة فوق رجمية حجار
وهالبومة بتضل تقول ببو بوبو وهالصبي اللي عالبركة وعقلاته بيخضو صار يقللها: يا أم سليمان! شبك يا أم سليمان شبك؟؟ شو بدك تشتري العجل ؟
بخمسمية قرش ؟
وهالبومة ما تقول غير بوبو بوبو
قام عصب الصبي وقلها لسى بتقولي ببو ببو؟ وضربها حجر من هلمنيح قامت فاتت تخبت برجمية الحجار، قامركض هالولد وراها وبحش ونو لقى خابية دهب.
قام قد ماو ذكي اخذ منها 500 قرش وتركلها العجل و رجع لعند أمه.
أمه سألتو وين العجل قلها :اشترته ام سليمان.
قالتله :أيا ام سليمان؟
قلها: ليش عم تسألي ؟؟؟ مشان تروحي وتسرقي لها المصريات؟؟
قالتلو:لأ يا ابني منشان تصير تجي لعنا وتسهر عنا ونسهر عندها و نصير جيران.
قلها :ايه هونيك بالرجمية و حط راسو ونام.
قامت هالأم أخذت كيسين وراحت تركض عالرجمية بحشت ونو لقت خابية الدهب حطتها بالكيس رجعت عالبيت. ولا كأنو شي صار.
وخلت معها ليرتين ذهب وراحت اشترت هبرة بالليرتين.
وقت اللي رجعت عالبيت سالها ابنها :وين كنتي ؟ سرقتي المصريات لام سليمان ؟ قالت له لأ
كنت عند الجيران يا حبيبي.
والله تاني يوم هالأم سوت كبة وكترت. وقالت لابنها أنا رايحة لعند جيرانا بعد شوي بدها تمطر الدنيا كبة وعروق ابقى لملمي اياهون من الشباك وكوشهون لارجع.
قلها الصبي ايه............
قامت هي راحت وطلعت عالسطح وصارت تكت هالكبة من الشباك شوية ومن الباب شوية لحتى انخوت وعبالها الطناجر.
ولما رجعت قلها: شوفي قديش جمعتلك قالتله ايه يسلم ايديك.
وبعد كم يوم رجعت المجنونة ع راسو وقلها :بدي روح اتشكى عليكي.
قالتله ليش؟
قلها :لانك سرقتي المصريات لام سليمان .......
يا ابني ما سرقت شي ..........
لا بدي روح
قالتله: ايه روح متل ما بدك.
والله هالصبي راح لعند القاضي وقللو: يا سيدنا القاضي امي سرقت المصريات لام
سليمان......
قله أي ام سليمان؟
قله اللي ساكنة بالرجمية.
سأله وين أمك ؟
قله برا ...
روح عيطلها
فاتت امه وسألها القاضي شيي المصريات اللي سارقتيهم؟؟
قالتله: ما سرقت شيء يا سيدنا القاضي بس هيدى الولد هايشششة وما بيفهم. هه شوف كيف! اسألو أي نهار سرقت امك المصريات؟؟؟
قللو القاضي: أيا نهار سرقت أمك المصريات يا ولد؟
قال الصبي: كيف أيا نهار؟ نهار اللي نزلت فيه الدنيا كبة وعروق!!!
قله القاضي ليش الدنيا بتنزل كبة وعروق؟؟؟ طلاع لبرا طلاع!!
قام هالقاضي عرف انه الولد هايشششششششششة وطفروا ورجعت الأم مبسوطة بالمصاري.
وتوتة توتة بعبكن مفلوتة.
|
|
29-4-2004
14:36
|
|
مجيد
عضو مميز
|
يسلم هالتوم
والله حكيك متل البلسم
شو أخبار نيو كاسل بعد الخطبة ؟
خلينا على تواصل على الايميل الجديد : m-rahal@scs-net.org
جميع الشباب هون يسلمون عليك
يالله سمعنا شي حكاية جديدة من سوالفك الحلوة
|
|
5-5-2004
21:54
|
|
تبارك
عضو مميز
|
يسلم
و هالانامل يا ابو عمر ولا تنسانا من القصص الحلوة
|
|
7-5-2004
19:38
|
|
النَّشمي
عضو مميز
|
عجلي يا (-.¸¸.•´¯`•.¸¸.•´¯ ســــــتي -.¸¸.•´¯`•.¸¸.•´¯)...
قبل ما يجي (-.¸¸.•´¯`•.¸¸.•´¯ جــــــدي -.¸¸.•´¯`•.¸¸.•´¯)
----------------------------------
سلامي للجميع.........
|
|
8-5-2004
13:34
|
|
مسعود حمود
عضو مميز
|
----------------------------------
مدونتي
|
|
26-5-2009
07:28
|
|
ثائر
عضو مميز
|
سلامات
هلا دكتور عبد المجيد ( منور )
شو عبالك يا عم عما تسمع قصص و حكايا من الأخ حمود ( مشكور )
تحياتي للجميع و لــــــ ستي و جديـــــــــ و صغار و كبار
----------------------------------
فالله خيٌر حافظــــــــــاً و هو أرحــــــم الراحمين
|
|
28-5-2009
18:33
|
|
